អង្គការចីរភាពបរិស្ថានកម្ពុជា បើកកិច្ចប្រជុំបូកសរុបការងារឆមាសទី១ និងលើកទិសដៅការងារបន្តឆមាសទី២ ប្រចាំឆ្នាំ២០២៦
នាព្រឹកថ្ងៃព្រហស្បតិ៍ ទី២០ ខែសីហា ឆ្នាំ២០២៦ លោកបណ្ឌិត ហោ គន្ធា ប្រធានអង្គការចីរភាពបរិស្ថានកម្ពុជា បានដឹកនាំកិច្ចប្រជុំបូកសរុបលទ្ធផលការងារឆមាសទី១ និងលើកទិសដៅការងារបន្តសម្រាប់ឆមាសទី២ ប្រចាំឆ្នាំ២០២៦ ដោយមានការចូលរួមពីសំណាក់ថ្នាក់ដឹកនាំកណ្តាល ប្រធានសាខាខេត្ត ព្រមទាំងសមាជិក សមាជិកា និងក្រុមការងាររបស់អង្គការចីរភាពបរិស្ថានកម្ពុជា។
កិច្ចប្រជុំនេះត្រូវបានរៀបចំឡើងក្នុងគោលបំណងពិនិត្យ និងវាយតម្លៃលើលទ្ធផលការងារដែលអង្គការបានអនុវត្តក្នុងរយៈពេលឆមាសទី១ កន្លងមក ព្រមទាំងពិនិត្យបញ្ហាប្រឈម ចំណុចខ្វះខាត និងបទពិសោធន៍ដែលទទួលបាន ដើម្បីធ្វើជាមូលដ្ឋានសម្រាប់ការកែលម្អប្រសិទ្ធភាពការងារនាពេលបន្តទៅមុខ។
ក្នុងឱកាសនោះ អង្គប្រជុំបានធ្វើការបូកសរុប និងពិនិត្យឡើងវិញនូវសកម្មភាពសំខាន់ៗដែលបានអនុវត្តពាក់ព័ន្ធនឹងការងារការពារ និងអភិរក្សបរិស្ថាន ការលើកកម្ពស់ការយល់ដឹងរបស់ប្រជាពលរដ្ឋអំពីការថែរក្សាអនាម័យ និងបរិស្ថាន ការចូលរួមសម្អាតទីសាធារណៈ ការដាំដើមឈើ និងការជំរុញការចូលរួមរបស់សហគមន៍ក្នុងការថែរក្សាធនធានធម្មជាតិ។
ជាមួយគ្នានេះ កិច្ចប្រជុំក៏បានពិភាក្សាអំពីការពង្រឹងកិច្ចសហការរវាងថ្នាក់ដឹកនាំកណ្តាល សាខាខេត្ត និងសមាជិក សមាជិកា ដើម្បីធានាឱ្យការអនុវត្តកម្មវិធី និងសកម្មភាពរបស់អង្គការប្រព្រឹត្តទៅដោយមានការសម្របសម្រួលល្អ មានប្រសិទ្ធភាព និងឆ្លើយតបបានទៅនឹងតម្រូវការជាក់ស្តែងរបស់សហគមន៍ និងបរិស្ថាននៅតាមមូលដ្ឋាន។
លោកបណ្ឌិត ហោ គន្ធា បានណែនាំដល់ថ្នាក់ដឹកនាំ និងក្រុមការងារគ្រប់ផ្នែក ឱ្យបន្តពង្រឹងស្មារតីទទួលខុសត្រូវ សាមគ្គីភាព និងកិច្ចសហការផ្ទៃក្នុង ព្រមទាំងយកចិត្តទុកដាក់លើការអនុវត្តការងារឱ្យបានជាក់ស្តែង មានផែនការ និងមានលទ្ធផលច្បាស់លាស់។ ជាពិសេស ត្រូវបន្តផ្សព្វផ្សាយអប់រំប្រជាពលរដ្ឋ និងយុវជនឱ្យយល់កាន់តែច្បាស់ពីសារៈសំខាន់នៃការការពារបរិស្ថាន និងការប្រើប្រាស់ធនធានធម្មជាតិប្រកបដោយចីរភាព។
សម្រាប់ទិសដៅការងារឆមាសទី២ ប្រចាំឆ្នាំ២០២៦ អង្គការនឹងផ្តោតលើការបន្តអនុវត្តសកម្មភាពការពារ និងអភិរក្សបរិស្ថាន ការរៀបចំសកម្មភាពសម្អាតបរិស្ថាន និងទីសាធារណៈ ការដាំ និងថែរក្សាដើមឈើ ការផ្សព្វផ្សាយចំណេះដឹងបរិស្ថាន ព្រមទាំងការពង្រឹងការចូលរួមពីសហគមន៍ ស្ថាប័នពាក់ព័ន្ធ និងភាគីពាក់ព័ន្ធនានា។
អង្គប្រជុំក៏បានលើកទឹកចិត្តឱ្យប្រធានសាខាខេត្ត និងសមាជិក សមាជិកា បន្តចុះអនុវត្តការងារនៅមូលដ្ឋានឱ្យបានសកម្ម និងទៀងទាត់ ព្រមទាំងរាយការណ៍អំពីលទ្ធផលការងារ បញ្ហាប្រឈម និងសំណូមពរនានា ដើម្បីឱ្យថ្នាក់ដឹកនាំអង្គការមានមូលដ្ឋានក្នុងការដោះស្រាយ និងជំរុញការងារឱ្យកាន់តែមានប្រសិទ្ធភាព។
ជាចុងក្រោយ លោកបណ្ឌិត ហោ គន្ធា បានថ្លែងអំណរគុណចំពោះថ្នាក់ដឹកនាំកណ្តាល ប្រធានសាខាខេត្ត សមាជិក សមាជិកា និងក្រុមការងារទាំងអស់ ដែលបានខិតខំប្រឹងប្រែងចូលរួមអនុវត្តបេសកកម្មរបស់អង្គការកន្លងមក។
លោកបានជំរុញឱ្យគ្រប់ភាគីបន្តរក្សាសាមគ្គីភាព និងស្មារតីសហការគ្នា ដើម្បីរួមចំណែកលើកកម្ពស់ការងារការពារបរិស្ថាន និងការអភិវឌ្ឍប្រកបដោយចីរភាពនៅកម្ពុជា។
កិច្ចប្រជុំបានប្រព្រឹត្តទៅក្នុងបរិយាកាសសាមគ្គីភាព និងការទទួលខុសត្រូវ ដោយមានការចូលរួមផ្លាស់ប្តូរយោបល់ និងបទពិសោធន៍ពីអ្នកចូលរួម ដើម្បីរួមគ្នាកំណត់ទិសដៅការងារឱ្យកាន់តែច្បាស់លាស់ និងមានប្រសិទ្ធភាព សម្រាប់ការអនុវត្តក្នុងឆមាសទី២ និងបន្តទៅមុខទៀត ៕
