ក្រសួងមហាផ្ទៃ បានឱ្យដឹងថា នៅទូទាំងប្រទេសកម្ពុជា ក្នុងរយៈពេលពេញមួយខែកញ្ញា ឆ្នាំ២០២៦ មានករណីអគ្គិភ័យកើតឡើងសរុបចំនួន៤៦ករណី និងបណ្ដាលឱ្យមានការខូចខាត និងប៉ះពាល់ជាច្រើន។

បើតាមរបាយការណ៍ក្រសួងមហាផ្ទៃ គ្រោះអគ្គិភ័យទាំងនោះ បានបណ្ដាលឱ្យឆេះផ្ទះប្រជាពលរដ្ឋ៣៩ខ្នង ឃ្លាំង៦ខ្នង រោង៣ខ្នង ហាងលក់ទំនិញ១កន្លែង តូប១ ព្រះវិហារ១ កុដិ១ រោងសិប្បកម្ម១ខ្នង រោងសម្ងួតស្រូវ១ខ្នង ឡដុតកម្ទេចរណា ១កន្លែង សាលាឆាន់ ១ខ្នង គំនរសម្រាម១កន្លែង។

របាយការណ៍ដដែលបានឱ្យដឹងទៀតថា ករណីអគ្គិភ័យទាំងនោះ មាននៅរាជធានីភ្នំពេញ ខេត្តកំពង់ចាម កំពង់ឆ្នាំង ត្បូងឃ្មុំ មណ្ឌលគិរី សៀមរាប បាត់ដំបង ព្រះសីហនុ ឧត្តរមានជ័យ កណ្ដាល ស្វាយរៀង កំពង់ធំ តាកែវ និងខេត្តព្រៃវែង។

ជាមួយគ្នានេះ ក្រសួងមហាផ្ទៃ ក៏បានរំឭកប្រជាពលរដ្ឋទាំងអស់ ត្រូវបង្កើនការប្រុងប្រយ័ត្នឱ្យបានខ្ពស់បំផុតចំពោះគ្រោះអគ្គិភ័យ ទោះបីជាបច្ចុប្បន្នស្ថិតក្នុងរដូវវស្សាក៏ដោយ ជាពិសេសក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌ ទាំងនៅតាមខ្នងផ្ទះ ទីសក្ការៈ និងវត្តអារាមជាដើម។

ក្រសួងមហាផ្ទៃ សង្កត់ធ្ង់ថា បើសិនក្នុងករណីមានគ្រោះអគ្គិភ័យកើតឡើង សូមប្រជាពលរដ្ឋរាយការណ៍ទៅកាន់អាជ្ញាធរមូលដ្ឋាន ឬប្រញាប់ទាក់ទងទៅកាន់លេខទូរស័ព្ទ ១១៨ ឬតាមកម្មវិធីតេឡេក្រាម ១១៨ ដើម្បីសុំការអន្តរាគមន៍ពីកម្លាំងជំនាញ ឬរាយការណ៍បន្ទាន់ជូនអាជ្ញាធរមូលដ្ឋានដែលនៅជិតបំផុត៕